Òganizasyon Entènasyonal Frankofoni (OIF) anonse li sot fòme 600 polisye kenyan, ki ap vin Ayiti, nan pale fransè ak kreyòl. Nan demach sa, yo fè konnen polisye sa yo jwenn fòmasyon tou nan sa ki gen pou wè ak diferans kilti ayisyen an genyen pa rapò ak pa yo a.
«Se anvwaye espesyal sekretè jeneral Frankofoni an, Ndayizeye Domitien ak konseye espesyal politik ak diplomatik sekretè jeneral la, Désiré Nyaruhirira ki te remèt diplòm yo bay polisye kenyan sa yo», daprè sa nou li nan yon mesaj òganis entènasyonal la pibliye sou kont X yo.
Selon OIF, fòmasyon sa te fèt pandan 3 semèn sòti mwa septanm pou rive premye novanm 2024 la, nan vil Naywobi, kapital Kenya. Yo soulinye, li fèt nan kad kout men yo ap bay fòs miltinasyonal la nan ranfòse kapasite lenguistik ak lakilti polisye sa yo.
«Te gen yon modil ki te pale sou sosyo-kiltirèl Ayiti a menm. Sa ki pèmèt patisipan yo konnen pi byen Kilti ayisyèn nan, kontèks sosyo-kiltirèl la ak pwoblèm entèkilrèl la ka fè nan misyon an», daprè eksplikasyon OIF bay. Pi lwen yo fè konprann pou aprantisaj polisye yo, responsab yo te oblije devlope kèk aplikasyon leksik ki pèmèt yo ka reyaji tankou : Leksikopè ak leksikoze.
Fòk nou di, seremoni pou te fini ak fòmasyon sa te fèt premye novanm pase a, an prezans kèk enspektè jeneral adjwen Polis kenyane nan, anbasadè Lafrans nan Kenya ak nan Somali, ak direktè alyans fransè Naywobi a.
N ap raple, selon deklarasyon prezidan William Ruto te fè, ta dwe gen 600 polisye ki vin Ayiti pou ranfòse ekip ki te la deja. Men jouskaprezan, poko gen pyès dat pou vini ajan sa yo sou sòl ayisyen an.
Atik sa se pwopriyete prive ©️ Gwoup Medya MAGHAITI 2024
