Prezidan Kenya a, William Ruto pandan vizit li jounen samdi 21 septanm 2024 la an Ayiti anonse genyen 600 nouvo polisye k ap antre vin ranfòse Misyon Miltinasyonal Soutyen ak Sekirite (MMSS) a.
William Ruto ki genyen ofisye nan peyi l anndan peyi a te pwofite vizite peyi a ayè samdi a avan menm li te ale Etazini pou al patisipe nan 79yèm asanble jeneral Nasyonzini an. Pandan pasaj li nan peyi a, chèf leta kenyan an te pwofite di jan l kontan wè anpil pwogrè ki fèt nan domèn sekirite an Ayiti.
«Jodi a gen plis sekirite alantou ayewopò entènasyonal Toussaint Louverture a. Genyen tou plis sekirite nan palè nasyonal la, nan lopital jeneral la, nan Akademi Lapolis la ak plizyè santèn nouvo rekrite ki nan fòmasyon, san nou pa mansyone plis siveyans nan pò yo» se sa William Ruto deklare nan yon konferans pou laprès ak prezidan Konsèy la, Edgard Leblanc Fils.
Mesye Ruto anonse tou genyen 300 ofisye Kenya k ap gen pou vini nan mwa oktòb k ap vini la e 300 lòt yo ap vini nan mwa novanm nan. Polisye sa yo ap vini pou ranfòse kapasite resous moun misyon an, selon detay chèf gouvènman kenyan an bay.
Prezidan peyi afriken an te ale tou nan baz ki genyen misyon entènasyonal la pou founi je gade sitiyasyon an ak evalye kondisyon lavi polisye li yo ki deplwaye an Ayiti.
Se te yon akazon pou prezidan Ruto te chante, priye ak sòlda peyi l yo ki gen plis pase 2 mwa deyò. Nan deklarasyon l, li fè konnen prezans li nan peyi a se an premye rankontre otorite ayisyèn yo pou diskite sou sitiyasyon an. Epi yon lòt bò, se pou rankontre pèsonèl yo nan MMSS la ki anba lòd Enspektè Godfrey Otunge.
Pi lwen, li di rapò li jwenn jodi a pou gouvènman an, responsab MMSS yo ak responsab Polis Nasyonal Ayiti (PNH) yo bay anpil ankourajman. Rapò yo daprè sa l soulinye, montre klè li posib pou bay Ayiti sekirite. Li te tou pwofite ensiste sou nesesite ki genyen pou misyon an gen resous ak ekipman enpòtan pou kapab kontinye ede nan mete sekirite nan peyi a.
Atik sa se pwopriyete prive ©️ Gwoup Medya MAGHAITI 2024
