26 sitwayen ayisyen pami yo 2 timoun anpwazonnen nan yon ji yo te bwè pandan yo te ap travay an Repiblik Dominikèn. Selon anbasad Ayiti nan peyi sa, Ayisyen sa yo lopital depi ayè dimanch premye desanm 2024 la.
«Anbasad Ayiti an Repiblik Dominikèn fè nou konnen ayè premye desanm nan yon gwoup 26 konpatriyòt, pami yo 2 timoun, te gen gwo vant fè mal pandan yo t ap travay nan jaden zonyon, nan zòn Azua», daprè yon nòt responsab yo pibliye jodi lendi 2 desanm 2024 la.
Nan eksplikasyon otorite yo bay yo, yo fè konprann se neglijans yon anplwaye ki te sèvi moun sa yo nan veso sal. Poutan, selon Diario Libre ki rapòte pawòl medsen nan lopital Taywan ki te resevwa yo a, yo di yo sanble anpwazonnen ak pestisid òganofosfore.
Vomisman, krache anpil, gwo doulè se pami siy direktè lopital la, doktè Luis Edward Pérez
di Ayisyen sa yo te genyen. Se sa k fè, yo soulinye yo te fè tretman rapid pou yo e anonse yo ta dwe ale lakay yo aprè yon jou.
N ap souligne, otorite ayisyen yo fè kwè yo bay tout asistans ak viktim yo. E anonse tou yo rete an kontak ansanm ak otorite dominiken yo pou ankèt ki dwe mennen sou dosye sa.
© Tous droits réservés – Groupe Média MAGHAITI 2024
