Nan kad yon operasyon Polis Nasyonal Ayiti a (PNH) mennen ayè dimanch 16 fevriye 2025 lan, nan nivo Dèlma 30, 2 bandi tonbe nan afwontman yo. Daprè sa lapolis la enfòme nan yon kominike jodi lendi 17 fevriye a, yo sezi plizyè inifòm enstitisyon an.
Selon yo menm, operasyon sa fèt aprè bandi ak zam ki nan kowalisyon Viv ansanm nan te boule plizyè kay nan zòn nan, nan lannuit 15 pou rive 16 fevriye a. Nan moman sa, fòs lòd yo di yo sezi radyo kominikasyon, inifòm Kò Entèvansyon ak Mete Lòd (CIMO) ansanm ak inifòm Polis Administratif.
Selon enfòmasyon PNH la pataje, se yon operasyon Brigad Entèvansyon (BI) nan jiridiksyon Dèlma te fè nan tèt kole ak inite elit SWAT/GIPNH. Li te fèt nan lide pou te goumen kont atak bandi kriminèl Viv ansanm yo ki t ap eseye antre Dèlma pou vin simen latwoublay.
Lapolis pwofite nòt sa a pou raple l ap kontinye pran angajman nan mennen batay pou kraze gwoup gang yo sou tout teritwa nasyonal la. Tout sa se yon fason pou rive retabli lapè ak sekirite nan peyi a.
Atik sa se pwopriyete prive © Gwoup Medya MAGHAITI 2025
