Nan yon bilan yo pibliye jodi madi 24 desanm 2024 la, Pwoteksyon Sivil fè konnen genyen, pou kounye a, ototal 13 moun ki mouri, ak 15 lòt ki blese nan inondasyon ki gen nan plizyè vil nan peyi a. Responsab yo fè konprann gen 4 depatman ki anba dlo akoz lapli ki pa sispann tonbe a.
Mete sou kote moun sa yo ki mouri ak blese yo, Pwoteksyon Sivil presize tou genyen yon moun ki disparèt. Pou sa ki gen pou wè ak dega materyèl yo, yo soulinye genyen 16 515 kay ki anvayi ak dlo, 501 lòt kraze nèt epi genyen 101 kay ki andomaje.
Selon yo menm, depatman Nòdwès, Grandans, Nip ak Nò anvayi ak dlo. E wout yo, kay yo ak tè moun yo konn travay sibi tout move konsekans yo. Fas ak sitiyasyon sa, Pwoteksyon Sivil anonse ekip yo sou plas pou asire popilasyon an jwenn tout asistans nan gwo bezwen imanitè yo ye a.
N ap soulinye, malgre Inite Idwometeyowolojik Ayiti (UHM) anonse Fwon Fwa a ap retire kò l sou peyi a mèkredi 25 ak jedi 26 desanm nan, yo anonse ap toujou genyen lapli nan kèk zòn nan aprèmidi ak nan lannuit.
Se pou sa, yo fè konprann toujou genyen avi inondasyon sou gran Nò a ak gran Sid la. Yo eksplike, tè nan zòn sa yo paka pran dlo ankò. Nan sans sa, responsab yo mande pou popilasyon an, sitou sila yo ki rete nan zòn danje yo, rete veyatif epi respekte tout konsiy otorite meteyowolojik yo bay yo.
Atik sa se pwopriyete prive © Gwoup Medya MAGHAITI 2024
