Fernande Mery tout moun konnen sou non Sama la souriante mouri samdi ki te 27 jiyè 2024 la, nan yon lopital kote l t al akouche. Se mari l Jerry Sainteron, direktè Levanjil Media, ki konfime enfòmasyon an sou paj Fesbouk li. Jouskounya se yon nouvèl ki lage anpil chagren nan kè pwòch li ak divès moun ki te konn suiv enfliyansè a sou rezo sosyo yo.
“Kè m ap rache m pandan m ap ekri tèks sa, paske mwen santi yon pati nan mwen ale, mèsi pou bèl pitit sa ou ban mwen an. Ke Bondye resevwa w nan Wayòm li an, mwen pap janm bliye w Sama la Souriante”, daprè pawòl mari Sama te pibliye sou kont fesbouk li. Li te kontinye pou di li espere jwenn fòs pou aksepte lanmò madanm li e rive pran swen timoun yo a ki gen sèlman kèk jou depi l fèt.
Sama la Souriante oubyen Madan Dyefò se te yon kreyatè kontni. Li te konn pibliye videyo sou kòman kèk sitwayen chinwa konn fè manje. Kontni sa yo te konn toujou jwenn apresiyasyon fanatik li yo. Dayè, aktyèlman Sama la Souriante genyen 225 mil moun k ap suiv li sou Tiktok, 63 mil lòt sou kont fesbouk li.
Dènye videyo viktim nan te poste sou paj li se te 3 jiyè 2024 la. Jounen jodi a, videyo sila fè 8.6 mil reyaksyon epi gen plizyè kòmantè fanatik ki pa sispann voye omaj pou enfliyansè a ki selon yo menm te yon sous lajwa pou yo.
“Nou pa t swete jwenn yon nouvèl konsa, men se sa k lavi”.
“Se pou nanm ou repoze nan lapè, m pa t vle kwè men lè m wè best Friend ou enkosolab m oblije kwè”.
“Se te dènye ri mwen nan videyo ou, oh Sama lanmò ou atriste m”, se pami kèk kòmantè fanatik Madan Dyefò yo ekri sòti samdi pou rive nan lannuit dimanch 28 jiyè 2024 la.
N ap soulinye, plizyè pèsonalite rann gwo omaj ak Fernande Mery. Pami yo nou jwenn Mackenson Souffrant ak Lynn ki anime “Ti koze ak Lynn”.
Atik sa se pwopriyete prive © Gwoup Medya MAGHAITI 2024
